أمير طعيمة عن منح محمد صلاح شارة المنتخب: «الاتحاد يمنح ما لا يملك لمن لا يستحق»

أبدي أمير طعيمة الشاعر الغنائي رأيه في أزمة قرار حسام البدري المدير الفني للمنتخب الوطني منح شارة قيادة منتخب مصر للدولي المحترف محمد صلاح لاعب ليفربول الإنجليزي.

وقال طعيمة عبر صفحته الرسمية على موقع التواصل الاجتماعي فيس بوك متحدثا عن الأزمة "

أنا مع فكرة انه يكون فيه استثناء في منح شارة الكابتن للاعب الأقدم بس في حالات معينة، يعني مثلا لو عمرو السولية أو أحمد علي أو أي لاعب شارك في المنتخب علي فترات متباعدة كان الدور عليه لحمل شارة الكابتن أقدر أفهم أنه يتم تجاوزه و منحها لصلاح نظرا لأنهم و إن كانوا أقدم منه على الدفاتر و لكن في الواقع العملي صلاح أكثر مشاركة و تأثيرا ده غير انه فيه مواصفات الكابتن من حيث المهارة القيادية و الخبرة الدولية و حب زملائه و اعتباره قدوة ليهم.

في ليفربول فان دايك بيكون كابتن علي لاعبين أقدم منه بس أقدم منه بسنوات بسيطة، بس في حالة وجود ميلنر أو هندرسون بيكونوا هم الكباتن حتي لو نزلوا الملعب كام دقيقة، عشان الناس دي أفنت عمرها في ناديها ده غير انهم لديهم المواصفات القيادية اللي تخلي تجاوزهم أمر غير مبرر و هنا مربط الفرس.

صلاح ممكن يتجاوز أسماء تسبقه في المنتخب في حالات معينة، لها صلة بنسبة المشاركات أو الأقدمية البسيطة زمنيا،  لكن في وجود أحمد فتحي فالوضع مختلف تماما، انت بتتكلم عن لاعب دولي من سنة ٢٠٠٣ و بداية من سنة ٢٠٠٦ و هو بياكل النجيلة و شايل المنتخب في أصعب الظروف و بلا شك هو من أفضل المدافعين في تاريخ مصر و أفريقيا، هو بمعني الكلمة إدي عمره الكروي بالكامل لمنتخب بلده، و علي اختلاف المدربين طول المدة دي و هو موجود و بقوة، و كل ما مدرب ييجي و يقول احلال و تجديد يستثنيه من الشرط ده لأنه دايما بيفرض نفسه علي أي مدرب.

وهاجم الشاعر الغنائي اتحاد الكرة بشأن هذا الأمر قائلا " إعلان اتحاد الكرة بمنح صلاح شارة الكابتن دون الرجوع لفتحي فيه إهانه لتاريخه و الاتحاد يمنح ما لا يملك لمن لا يستحق، و تمسك فتحي بشارة القيادة حق أصيل له ما لم يكن هو اللي عايز يعمل كده.

أنا عمري ما التقيت بأحمد فتحي علي عكس صلاح اللي عارف كويس أنا بحبه و بحترمه ازاي و بفخر بيه زي أي مصري و بدعمه طول الوقت، بس الحق أحق أن يتبع.

إتحاد الكرة: افتعلت أزمة من لا شيء و صلاح مش محتاج شارة الكابتن و مشاكله معاكم مش ده حلها، و ترضيته واجب عليكم و لكن مش علي حساب حد.

محمد صلاح: أنا واثق إن في أول تجمع انت اللي هترفض الحصول علي شارة الكابتن في ظل وجود أحمد فتحي، و كالعادة هتتصرف صح و بالأصول، و متأكد إنك مش هتزعل من كلامي اللي لا أهدف منه الا لقول كلمة حق،#أحمد فتحي #محمد صلاح"

وكان حسام البدري المدير الفني للمنتخب الوطني قد أعلن عزمه عن منح شارة قيادة المنتخب لمحمد صلاح متجاوزا أحقية أحمد فتحي فيها الأمر الذي رفضه الأخير بشكل قاطع وتمسكه بحقه في الشارة معلنا رفضه الانضمام للمنتخب في حالة منح صلاح الشارة.