بأقلامهم

حاتم الدالي يكتب: فانتازيا المعدداتي والمثقف

حوار المعدداتي والمثقف

ايه اللي انت بتعمله ده انت تساعد علي الجهل وتفشي المنفعة الشخصية وافساد المجتمع واستمراره علي ثقافة المنفعة

يا عم انا بعمل اللي الناس عايزاه

لا ده مش حقيقي انت بتضللهم

انا مالي هما كده هو انا اللي حصلح الكون

انت تقدر تصلح الكون لو قلت الحق ونفذت تعاليم دينك

ديني ما انا بصلي وبصوم

بس بتكذب وتنافق وتدلس وتخفي الحقائق

يا عم المثل بيقول اربط الحمار مطرح ما يقول صاحبه وبعدين الناس بتزعل من الحقيقة وانا مش عايز ازعل حد وحقيقه ايه انا معرفش حاجه

ما تعرفش حاجه ازاي مهمتك البحث عن الحقيقة والسعي خلفها ده دورك وواجبك

هو أنا فاضي اقرا ولا اعمل حاجه ولو قرأت يا عم ده بيكتبوا كلام مبفهموش كلام كبير كده

كلام كبير ايه اللي ما بتفهموش ايه ده انت المفروض مشرع يعني بتقترح وبتضع وتصيغ قوانين

يا عم قوانين ايه هو انا فاضي ده انا من العزاء ده للفرح ده للطهور ده ده انا اللي معزته بتولد بروح اقوله حمدا لله علي سلامتها

الله ده انت شغال زي المعددة

يعني ايه

الست اللي بتؤجر في الميت تولول والفرح تزغرط والسبوع تدق الهون

لا يا عم انا بجامل الناس علشان تنتخبني طيب وبعد ما تنتخبك مش المفروض تحارب علشانهم

ما هو انا عمال اخد طلبات وألف بيها من وزاره لوزارة واتلطع علي باب ده وابوس ايد ده وفي الاخر بيدونا تأشيرات مضروبة

طبعا لازم لأنك مش فاهم حاجه ومش بتحترم نفسك ولا محترم اللي انتخبوك انت ضحكت عليهم من الاول للأخر

والله انا ما ضربتش حد علي ايده

لا انت ضللتهم انت شخص ضال ومضل ومضلل

الله ليه الغلط ده

ده مش غلط اقرأ دينك جيدا وستعرف من انت

ولله الامر من قبل ومن بعد

كاتب المقال/ نائب رئيس حزب الحركة الوطنية المصرية للشئون السياسية والتنظيم

اقرأ أيضا

حاتم الدالي يكتب: النقد البناء

حاتم الدالي يكتب: من حق الدولة التدخل لضبط الأسعار كي تحمي مواطنيها

حاتم الدالي يكتب: تهيئة المناخ للاستعمار

مقالات ذات صلة

زر الذهاب إلى الأعلى
إغلاق