اهم الاخبار
الجمعة 29 مارس 2024
#الجمهوريةـالجديدة
رئيس التحرير
خالد العوامي

بأقلامهم

د. حسن سليمان يكتب: رجال أعمال الأونطة

د. حسن سليمان
د. حسن سليمان

لا صحيح ... هما مين رجال الأعمال وصفوة المجتمع اللي حضراتكم شاغلين بالكم بيهم وعايزينهم يتبرعوا لمصر ويقفوا معاها النهاردة في أزمتها؟! حضراتكم تقصدوا رجال الأعمال اللي أخدوا أراضي الدولة زمان بـ 10 قروش للمتر الواحد وعملوا عليها كومبوندات بفلوس البنوك ولموا مليارات في كام سنه بالأونطة؟! حضراتكم تقصدوا رجال الأعمال اللي تجارو في الأغذية الفاسدة ولا اللي دخول التأوي المسرطنة ولا اللي بيتاجروا بحاجة الفقراء ولا اللي عاملين شركات مع إسرائيل ولا اللي بيتاجروا في الأعضاء البشرية أقول كمان ولا كفاية؟! واللا تقصدوا رجال الأعمال اللي كانوا بيدفعوا ملايين علشان الشوارع تفضل مكسرة وحالها زي الزفت علشان يبيعوا قطع غيار السيارات ويشغلوا توكيلاتهم؟! واللا تقصدوا رجال الأعمال اللي كانوا بيتحالفوا مع الشيطان علشان متدخلش المياه الحلوة للمدن السياحية وساعتها يعرفوا يبيعوا مياه معدنية من خير مصانعهم ؟! واللا قصدكم أصحاب الطيارات الخاصة اللي يوم ما بيحصل حاجة بيطلعوا علي برة بفلوسهم وعيالهم وبيسيبوها تولع باللي فيها ولما الدنيا بتتظبط بيرجعوا تاني وهما لابسين قناع الوطنية !! واللا قصدكم المطربين اللي بيسافروا الخليج كام ساعة يعملوا حفلات خاصة في القصور مقابل شوال فلوس وشقق تمليك وإقامات دايمة ؟! واللا تقصدوا الممثلين اللي كل سنة بيلموا ملايين من ورا المسلسلات والبرامج الهايفة بتاعت رمضان ده غير أفلام العيد وفي الاخر بيتبرعوا لجمعيات مشبوهة ؟! واللا قصدكم لاعيبة الكورة اللي كل ما يجيبوا جول ينزلوا علي وشهم ساجدين شكر لله و بعد كده يسبوا الدين لبعض و يطلعوا متحرشين ؟! واللا قصدكم شيوخ الفضائيات بتوع ربنا اللي بيروحوا ڤلل القطامية هايتس و ڤلل الربوة علشان يدوا دروس ويهبدوا كام فتوي لمدام ناني ومدام شوشي مقابل ساعات روليكس و عربيّات ووظائف لمعارفهم ؟! واللا تقصدوا الإعلاميين اللي شاريين شقق في لندن وڤلل في أمريكا وواخدين باسبورات هما وعيالهم والدنيا زي الفل ويوم ما بيشتغلوا بيضيعوا مجهود الوزراء المحترمين ؟! واللا قصدكم أعضاء مجلس الشعب اللي كانوا بيتاجروا في السلاح واللي فاتحين مقراتهم للمصالح الشخصيه والرشاوي و اللي بيأجروا عربياتهم بنص مليون جنيه في اليوم لتجار المخدرات والآثار ؟! واللا يكونش قصدكم رجل الأعمال اللي كان بيبيع خط الموبايل زمان بـ 1200 جنيه أيام ما كان المبلغ ده وقتها بيشتري 54 جرام دهب واللي جاي النهاردة عامل مناحة؟! قصدكم مين واللا مين واللا مين !!! عموماً متتعبوش نفسكم وتسلم الشدة اللي كل مرة بتعرفنا مين بيحب البلد دي و خايف عليها بجد... ومين بيتاجر بيها وبمصايبها. تسلم الشدة اللي خليتنا نشوف المعدن الطيب للناس الأصيلة الشقيانة اللي واقفين في ضهر بلدهم اللي بيعملوا ليها بجد. تسلم الشدة اللي وضحت الصورة اللي كانت غايبه عننا ومكناش شايفينها. يااااريت محدش ينتظر من الباشوات و البهوات وولاد الأكابر أي حاجة... لإن المفروض بقى أننا أتعلمنا وفهمنا علي مدار السنين اللي فاتت إن كل أزمه في البلد دي بتخلص بفضل ربنا الاول وبعدين تعليمات الريس و بجدعنة الناس البسيطة و بمجهود الجيش و الشرطة. قوية يا بلدي من ٧٠٠٠ سنة سرقة ولست واقفة اسد. حفظ الله مصر .⁦

كاتب المقال عضو المكتب السياسي لحزب الحركة الوطنية المصرية