طريقة عمل تشيز كيك فراولة

المقادير

لطبقة البسكوت ( ٤ او ٥ باكو بسكوت على حسب الطبقة عاوزاها ادد ايه اى نوع بس يفضل يكون حاجة كويسه انا استخدمت شورتى / ٧ الى ١٠ م ك زبده سايحة / م ك سكر بودره )

للكريمه

نصف كيلو جبنة كريمى

كوب كريم شانتيه

علبة قشطه

كوب سكر بودرة

كوب لبن

كيس چيلى

م ص فانيللا

٢ م ك چيلاتين بودرة هحط عليه فنجان مايه فاتره ( اختيارى )

لطبقة الصوص ( كيلو فراولة و كوب سكر )

الطريقة

لعمل صوص الفراوله اللى على الوش هحط الفراوله و السكر على نار هاديه خالص و لما تنزل كل مايتها هضربها بالبلندر و تفضل على النار لحد ما تتقل خالص و لو عاوزين الطبقة ماسكه نفسها بزياده هحط نص كيس چيلى بس انا حبيتها سايله شويه

لعمل طبقة البسكوت

هضرب البسكوت كويس و هحط السكر البودره عليه و هوا بيتضرب هنزل الزبده واحده واحده لحد ما احصل على قوام رملى يعنى لو مسكت شويه فى ايدى و ضغطت عليها تعمل شكل هنزل البسكوت فى الصينية ممكن نعملها فى الصينية اللى بتتفتح و تتقفل و ممك نعملها فى بايركس عادى و اضغط عليها كويس جدا لحد ما اتاكد انها بقت متماسكه هحطها فى الثلاجة و يفضل الفريزر علشان تمسك نفسها

لعمل طبقة الكريمه : فى الكبة هنحط الجبنة و الفانيللا و اضربهم و بعدين الكريم شانتيه و السكر و اللبن و ممكن نقلل سكر لو عاوزين و بعدين هحط القشطة و هضربهم لحد ما اوصل لقوام الكريمه فى المرحلة دى اللى عاوز يحط چيلاتين اوكيه انا بفضله لانه بيخليها تمسك اسرع اللى مش عاوز مفيش مشكله بس هنسيبها وقت اطول فى الثلاجة علشان تتماسك بالنسبة للى هيحط چيلاتين هدخل الكوبايه اللى فيها چيلاتين و مايه فاتره الميكرويف او على حمام مائى لحد ما يذوب خالص و احطه على الكريمه و انا بقلب بسرعه كدا الكريمه عندى جاهزه لو حابين الكريمه كلها لونها ابيض خلاص نحطها كلها انا حطيت نصها بس و دخلتها الفريزر تانى و النص التانى بقى جبت نص كيس چيلى و حطيت عليه ربع كوب ماء مغلى و قلبته لحد ما ذاب و بعدين حطيت ربع كوب ماء بارد و سيبته يهدى و حطيته على نص الكريمه الباقية و حطيت معلقتين من صوص الفراوله اللى كنت بعمله على النار و قلبت و حطيت الطبقة دى عليهم و سيبتها ساعتين فى الفريزر او الثلاجة و لو فى الثلاجة يفضل وقت اطول علشان تمسك نفسها و بعدين حطيت صوص الفراوله اللى عملته اول حاجة و حطيتها شويه كمان فى الفريزر