أحمد السقا يعتذر للفنان تامر حسني : «أنا أخطات اني اتكلمت على الهواء»

مازال الخلاف بين الفنان تامر حسني والفنان احمد السقا، حديث السوسيال ميديا، بعد تصريح السقا في برنامج ”السيرة“ الذي قدمته الإعلامية وفاء الكيلاني، حيث صرح بأنه مستاء من ظهوره في الافيش كبطل للفيلم وهو ضيف شرف في فيلم ”الفلوس“ لأن ذلك ضره نفسيا، وبعدها خرج تامر حسني ليرد عليه معبرا عن حزنه من تصريحه لذلك على الهواء، ليعذر بعدها السقا من خلال منشور عبر صفحته، وننشر لكم التفاصيل خلال السطور المقبلة. اعتذار احمد السقا للفنان تامر حسني اعتذر الفنان أحمد السقا، لصديقه تامر حسني، عبر منشور على موقع ”فيسبوك“: «رسالة إلى صديق عزيز.. صديقى وأخي العزيز تامر حسني، أنت عارف اللي بيني وبينك، عيش وملح وحاجات كتير.. قد أكون أخطأت إني اتكلمت في الموضوع على الهواء، ولكن يعلم الله كم كنت مجروحا وكم كنت حزينا.. مش هاطول عليك أكتر من كده، ولو أنا زعلت شوية وأنت شوية نبقى خالصين يا عم.. تامر حسني إحنا اللي بينا كتير، ماتزعلش يا عم وحقك عليه، وميعادنا الحفلة اللي جاية». رد تامر حسني على تصريحات احمد السقا على فيلم الفلوس وكان الفنان تامر حسني رد على تصريح الفنان أحمد السقا الذي قاله خلال برنامج السيرة، من خلال خاصية الاستوري عبر ”إنستجرام“، وكتب: ”حبيبي وأخويا وصديق العمر ونجم الدنيا كلها أحمد السقا، كنت أتمنى إنك تكلمني بيني وبينك لو كنت زعلان من أي حاجة أو فاهم أي حاجة غلط، لأن الحاجات دي لا يمكن تفوتك وأنا كنت أتمنى مكتبش الكلام ده هنا بس عشان بعد كلامك في التلفزيون الجمهور الكريم بقى ليه حق إنه يفهم الصح“. وتابع: «عشان أفكرك بس، إنت كلمتني وقولتلي خبر في موقع وعليه صورة افتراضية للفيلم وكاتبين إنك بطل في الفيلم.. وأنا رديت عليك إن دي اجتهادات صحفية والصورة من تصميم المحبين اللي أكيد فرحوا بالخبر إننا مع بعض، حتى أنا مقولتش إن دي الشركة المنتجة لأنها شركة كبيرة لا يمكن تعمل كدا، لأن الفيلم متباع للخارج والداخل باسم أخوك تامر حسني، وأصلًا أفيش الفيلم الرسمي نزل والناس كلها شافته وإنت مش فيه ولا فيه اسمك وكل الأبطال طالعين مرسومين، معرفش زعلك من إيه الحقيقة، كان ممكن تزعل لو الكلام دا نزل على صفحتي أو صفحة الشركة المنتجة». وأضاف: «وأنا شرحتلك دا من سنة واتكلمنا بعدها مرتين، مرة عيدت عليك في عيد ميلادك والتانية بخصوص برنامجك لو كنت لسه زعلان كنت هتقولي ساعتها، الفيلم بقاله سنة يا أحمد، أخيرًا بقى مستحيل الشركة تروج أو أنا أفوت أو أسمح باستخدام اسمك كبطل للفيلم وإنت مش فيه، لإن دا هيعود علينا كلنا بالضرر لإن الناس هتدخل الفيلم مش هيلاقوا الكلام دا فيبقى إحنا كدا بنضحك على الناس وضرينا الفيلم ولأن أكيد يشرفني إن إحنا نمثل مع بعض بطولة مشتركة لأنك حبيبي بجد ونجم أنا بحبه من قلبي فعلًا». واختتم حديثه عن مشاركته بمسلسل «ولد الغلابة»: «وبعدين يا حاج أحمد لما أنا جيتلك مسلسلك حصل اجتهادات كتير من محبينك الكرام شويه يقولوا المسلسل بطولتنا وشويه يقولوا لا دا ضيف شرف بس وإنت عارف إن عمري ما عملتها وطلعت ضيف شرف غير ليك، دا أنت طلبتني أجي أصور الساعة 8 الصبح كنت عندك في نص ساعة عشان فكرة طلعت في دماغك فجأة وجيت لإنك غالي عندي أوي أوي فوق ما تتصور، وكنت بفرح باحتهادات محبيك ومحبيني حتى لو صورتي صغيرة أو كاتبين بطولة أو ضيف شرف كل دا مش فارق لإني جيت أخدم صديق عمري وأتمنى أي كلام يصب في مصلحة مسلسل أخويا وينجح ويكسر الدنيا، إنت حبيبي يا أحمد وصديق عمر عشان كدا أنا مش هزعل منك معلش طولت في الكلام لإن برضو زعلك يعزّ عليا». اقرأ أيضا: الفلوس سبب أزمة أحمد السقا وتامر حسنى .. تعرف على التفاصيل كاملة