هدايا السيسي لـ جو بايدن قبل توليه حكم أمريكا رسمياً

اغلاق قضية روجيني بقرار من النائب العام .. الحقيقة القرار ده بيعتبر  من اهم قرارات الدولة المصرية قبل سنة 2020 ما تقفل .. قرار الحقيقة بيحمل مدلولات ومعاني كبيرة جداً .. يمكن اهمها ان محدش هيقدر يلوي دراع مصر  .. وان الحملات اللي شغاله وبتتوعد مصر بالويل والثبور  مع قدوم رئيس جديد للولايات المتحدة الامريكية .. وان جو بايدن جاي عشان ينصب المحاكمات لمصر وقياداتها .. كلها حملات لا مؤخذه .. بتأكد اننا قدام شويه هجاصين .. عاوزين جنازة ويشيعواااا فيها لطم .

قرار النائب العام صدر وكانه بيقول لكل الاطراف " كش ملك " .. كش ملك عشان هنا مصر .. هنا القاهرة .. هنا محدش هيقدر يفرض علينا راي .. ولا هيمشي علينا قرار .. وان مصر لا هيمهااا بايدن ولا ابو بايدن  .. " وليحكم امريكا من يحكم .. فأنه شأن امريكي داخلي " .. ميخصناش يعني .. شأن داخلي امريكي ملوش اي علاقة مطلقاً باي قرار في الداخل المصري  .. ولا ليه اي تأثير علي مواقف بتاخدها .. او هتاخده القيادة المصرية .

قرار النائب العام .. كأنه  بيقول لايطاليا وبرلمان اوربا ان مصر مفيش علي راسها بطحة .. وان التقارير اللي كل شوية تطلع بشأن حقوق الانسان .. بهدف الضغط علي القرار المصري .. كلها تقارير معروف مسبقاً انها موجهة .. وليها ايدلوجية سياسية .. خاصة وان برلمان اوربا ده ملوش اي صلاحيات .. عكس ما ناس كتير فاهمة .. فيه ناس معتقده ان برلمان اوربا ده يعني ..  " استغفر الله العظيم يقول للشئ كن من فيكون "  .

وده مش حقيقي .. تقرير البرلمان الاوربي اللي اتكلم عن حقوق الانسان في مصر  .. تقرير لا يترتب عليه أى إجراء عقابي ضد مصر .. لانه في الاساس برلمان لا يملك اي صلاحيات .. وتقريرة مجرد اعلان راي فقط .. او تسجيل موقف لا اكثر ولا اقل  .. ورايه ده وموقفه .. زي ما بيقولوا كده .. " يبلوه ويشربوا ميته " .

من الاخر قرارات النائب العام .. بقفل ملف قضية روجيني .. واستبعاد الاتهامات الموجهة لعدد من ضباط الشرطة بقطاع الأمن الوطني .. انا باعتبرها هديه جديدة من هدايا الدولة المصرية والرئيس السيسي .. هدية قبيل تولي جو بايدن مهام منصبة رسميا في شهر يناير .. هدية موجهة لكل واحد بيراهن علي قدوم بايدن لرئاسة امريكا .. وكل واحد خسيس جبان .. منتظر ان بايدن يرجعه للمشهد في الداخل المصري .. خاب مسعاكم فهنا مصر  .

والغريب انك بتسمع كلام هلس كتير  .. كلام كده يخليك .. يخليك تشد في شعرك .. كلام بيؤكد ان الناس دي يا اما بتشرب صنف مغشوش .. يا اما الناس دي بتعيش في احلام وخيال واسع قوي  .. احلام مش موجودة علي كوكبنا كوكب الارض .. يعني مثلاً لما تشوف قناة الجزيرة .. جايبة ضيف .. والضيف قاعد بيفتي .. بيفتي بجد .. ويقول ان محمود السيسي هو اللي قتل جوليو روجيني .. وقال ايه الرئيس عبد الفتاح السيسي قدم رشوة لرئيس وزراء ايطاليا علشان يقفل القضية وميجبش سيرة محمود السيسي في اي بيانات رسمية هتصدر .. يعني اي حد في الدنيا لما يسمع كلام زي ده هيقول ايه .. كلام كدة وكانك قاعد بيتفرج علي عركة في خمارة ولا في حارة .. وقاعدين بيحلوها قبل ما يروحوا القسم .

لما تسمع كلام هلس زي ده .. يبقي لازم تتاكد انت هنا قدام ناس عايشة في عالم من الخيال .. ناس بتخترع قصص وحكايات وبتصدقها .. والاغرب بقي  انهم عاوزين الناس كمان تصدقها .. ارحموا عقولنا .. ارحموا  عقولنا مش كده يعني .

https://youtu.be/yciyjIRoiz4