ريهام سعيد تتصدر التريند بعد رسالتها للرئيس السيسي وتوضح: قربت اموت

تصدرت الإعلامية المصرية ريهام سعيد مؤشرات بحث جوجل العالمي، ومواقع التواصل الاجتماعي المختلفة، خلال الساعات القليلة الماضية، وذلك بعد تصريحاتها التي قالتها مؤخرا بخصوص ايقاف برنامجها واعتزالها، بالإضافة إلى أنها قامت بتوجيه رسالة إلى الرئيس عبد الفتاح السيسي.

وقالت ريهام سعيد عبر حسابها الرسمي على موقع التواصل الاجتماعي "فيسبوك": "كل حرف هاكتبه صادق ومن قلبي.. أنا حاسة إني هموت قريب عشان كده هابعد عن السوشال ميديا عشان أقعد مع أولادي أكتر وقت ممكن خصوصا ابني الصغير".

وتابعت: "يمكن سحر يمكن اكتئاب ويمكن حقيقي.. غالبا إحساس الظلم كان بيقتلني بالبطيء في يوم من الأيام الدنيا قامت علىّ عشان تعلب، أما المعراج وإنكارها عادي .. تامر أمين يغلط في الصعايدة قاصد أو مش قاصد يتوقف ٣ شهور، لكن أنا أعمل أكبر حملة للسمنة وأعالج آلاف من السمنة وعمليات ببلاش ويفتروا عليّ ويقولوا إني قلت إن ريحتهم وحشة وأتوقف سنة"

واضافت: "كفاية إننا عالجنا أعداد مهولة من الشباب من المخدرات ورحت أماكن خطر جدا عشان أوعي الناس بدل ما أتكرم ألاقي نفسي نايمة في أوضة متر في متر مع تاجري مخدرات".

واستطردت: "البرنامج يتوقف أطفال تموت ومدرسة ذوي الاحتياجات الخاصة اللي فاتحينها تتقفل وتطلع ريهام أفاقة وكدابة.. لو فضلت أحكي هاحكي كتير بس أنا موجوعة ومش قادرة أحكي.. لو مت أنا مش مسامحة.. مش مسامحة أي حد قال عليّ كلمة واحدة مش حقيقية أو على السمع.. مش مسامحة أي صحفي كتب عني كلمه ظلم مش مسامحة أي واحد كتب كومنت موت بيها أطفال القلب.. كفاية أن أي حاجة الإعلام بيتكلم فيها دلوقتي أنا متكلمة فيها من عشر سنين.. مش مسامحة ولا هاسامح .. مش مسامحة اللي بتسحرلي كل شوية".

ريهام سعيد توجه رسالة إلى الرئيس السيسي

واختتمت ريهام سعيد موجهة رسالة للرئيس المصري عبدالفتاح السيسي: "أنا لو مت وصيتي أولادي يعرفوا أنا حققت وعملت إيه لأن أكيد حضرتك مش عارف برضو.. أنا أولادي اتعذبوا ورايا في المحاكم والقضايا أنا ابني كان عنده شهرين زارني في السجن أنا بهدلت أهلي معايا عشان ولا حاجة كنت فاهمة إني هاصلح الكون".

وقالت: "أنا آسفة إني نجحت أنا آسفة إني كنت عايزة كل الناس تعمل خير أنا آسفه إني معملتش علاقات تسندني جوه أو برة مصر".

ريهام سعيد تكشف السبب وراء اعتزالها وتوضح "تعرضت للظلم"

وجهت الإعلامية ريهام سعيد رسالة لمتابعتها وأصدقائها، خلال الفترة الماضية، عبرت فيها عن شعورها بالظلم لما تعرضت له مؤخرا من البعض وكان السبب وراء اعتزالها، وذلك من خلال حسابها الشخصي على موقع التواصل الاجتماعي المعني بنشر الصور والفيديوهات إنستجرام.

قالت ريهام سعيد:" حسبي الله و نعم و الوكيل في كل مفتري و في كل افاق ساهم انه يقضي علي مجهود سنين طويله . حسبي الله ونعم الوكيل في كل واحد ساهم انه يصدر فكره غلط عني و عن شخصيتي . حسبي الله و نعم الوكيل في كل واحد جاب سيرتي عشان يشدني لمشكله و اطلع في الاخر بتاعت مشاكل لما يكون ليه رد فعل . .".

وتابعت:" حسبي الله و نعم الوكيل في كل واحد وقفت جنبه و اتخلي عني في وقت شده و عارفاهم بالاسم و مش هانسي . حسبي الله و نعم الوكيل في كل واحد مايعرفنيش و قال كلمه وحشه عني".

وأضافت:" حسبي الله ونعم الوكيل في كل صحفي كتب خبر في عز ازمتي عشان يقضي علي شغلي و اسمي انا ٢٢ سنه مقراتش كلمه كويسه مع اني حققت نجاح غير مسبوق . حسبي اله و نعم الًوكيل في كل واحد كتب بوست شتيمه عن جهل لما سمع و ماشافش المهم ان كل دول فاهمين انهم انتصروا غلطانين انا صحيح اعتزلت لكن انتوا كل يوم يتعرفوني اد ايه انا ناجحه و مهمه و شاطره".

واستطردت:" الناس الي كسبت من ورايا ملايين ورموني في الاخر و خربوا بيتي و سرقوا صفحتي الي عليها ١٥ مليون، لكل الي افتري عليه يا رب تصحي من النوم تلاقي الصراصير ماشيه علي وشك زي ما تكون في قبرك و تفضل محبوس ايام مش عارف النهار من الليل في مكان ..ان شاء الله يحصل للك زي ما حصل لي عشان تعرف اني اقوي من اي حد و باذن الله ربنا يعرفك انك ظالم في جهنم ان شاء الله".