الرئيس السيسي يتحدث عن دور حقل ظهر في دعم الدولة المصرية

تحدث الرئيس عبد الفتاح السيسي، عن دور حقل ظهر في دعم الدولة المصرية، قائلا: "ترسيم الحدود في البحر المتوسط مع قبرص واليونان.. وفى البحر الأحمر في السعودية.. كان له دور كبير في عمل الحقل.. لولا ترسيم الحدود مكنشي فيه شركات تعمل تنقيب.. ترسيم الحدود ده أول حاجة". 

وأضاف الرئيس : "عاوز أقولكم.. مش الفكرة ولا القدرة.. الفضل بتاع ربنا علينا.. لولا حقل ظهر كان زمان مصر مطفية.. مفيش فلوس ندفع كل سنة 2 مليار دولار شهريا من أجل تشغيل محطات الكهرباء، وده بالسعر القديم". 

أكد الرئيس السيسي علي دعم حقل ظهر لملف الكهرباء والطاقة في مصر، قائلا: "الأسعار الحالية كنا هنحتاج 10 مليار دولار في الشهر بالسعر الجديد.. ادفعهم للغاز لتشغيل محطات الكهرباء وتفضل منورة.. دول منين ؟!.. 120 مليار دولار في السنة.. اجبهم منين..  ولما جينا نعمل الترسيم الكل هاجمنا".

وأضاف الرئيس السيسي: "ربنا يسر الأمر.. شركة أيني بتقول 5 سنين علشان اخلص حقل ظهر.. قولت لا 18 شهر فقط.. مش 5 سنين.. انا موجود كل يوم.. أي مشكلة هخلصها.. معمل تكرير بيحتاج سنة و3 سنين لتخصيص الأراضي.. اتخصصت في ساعتين بالتليفون". 

وتابع الرئيس السيسي: "اتطلب يتعمل 10 آلاف خازوق لتجهيز الأراضي في بورسعيد الخاصة بمعامل التكرير.. اتحركت معدات بالآلاف كي نجهز الخرسانة الخاصة بالمعمل اللى بنتكلم عليه لحقل ظهر".

وأردف الرئيس السيسي: "من فضلكم.. والدكتور مصطفي بيتكلم بيقول عنوان ولكل عنوان حكاية لينا كلنا يا مصريين.. أنا عاوز اقولكم.. اللى أنت شايفه ده.. 25 ألف ساعة عمل بلا توقف مني ومن الدولة". 
 

وأضاف الرئيس السيسي:  أن إنجاز حقل ظهر تكلف 25 ألف ساعة عبارة عن 7 سنين.. 84 شهر.. 30 يوما.. 10 ساعات في اليوم على الأقل.. اللي حصل بالله.. والله بالله.. والله بالله.. ولا كان يحصل ابدا".

وأكد الرئيس السيسي، «لولا إيرادات حقل ظهر ما استطعنا بناء محطات كهرباء، حيث أن فاتورة سداد الغاز تتجاوز 2 مليار دولار شهريًا»

جاء ذلك خلال تعليق الرئيس عبد الفتاح السيسي، على كلمة الدكتور مصطفي مدبولي رئيس مجلس الوزراء، خلال المؤتمر الاقتصادي.