السيسي: 700 مليون جنيه تعويضات لإخلاء مكان محور المحمودية

قال الرئيس عبد الفتاح السيسي، إن شبكة الطرق كانت تخدم في السابق 30 مليون نسمة، معقبا: "مستغربين قوي من التكاليف.. خليني أقول لكم إن شبكة الطرق كانت تخدم 30 مليونا وعلشان كده ما كنتش تبني تنمية ولا حركة.. اللى إحنا بنعمله نحاول نعمل شبكة تناسب 100 مليون ويمكن لمدة 10 سنين كمان".

وأضاف الرئيس عبدالفتاح السيسي، خلال افتتاح محور المشير فؤاد أبو ذكري بالإسكندرية: "محور زى النوبارية كان ممكن ما يكلفناش لو ما كانش الناس اتعدوا على جسر المحور.. تخيلوا يا مصريين إن أنا بحمي جسر الترعة بالطريق.. أضطر علشان حماية الجسر أعمله طريق يخدم طريق ونحمي جسر أرض دولة .. ده معناه إن إحنا كدولة، المواطنين عندنا من كتر الأمور ما فكت مننا خلال السنين اللى فاتت خلاص بقا ابني عليه".

واصل الرئيس: محور المحمودية لو المحور ما كنش عليه أكتر من ألف أو ألفين وحدة على أرض دولة ودفعنا 700 مليون جنيه تعويض اجتماعي .. يعني رغم إنه مخالف ومش أرضه لكن قلنا ما نقدرش نسيب الناس كده ونمشيها.. اللواء هشام قال محتاجين 700 مليون جنيه علشان إخلاء المكان وإنشاء طريق بطول 70 كيلو".

معلومات المشروعات متاحة للجميع

قال الرئيس عبد الفتاح السيسى إن الدولة تعمل فى كافة القطاعات، مضيفا: "الدولة شغالة فى القطاعات المختلفة.. لا تغفل قطاع.. اتصالات وتعليم وصحة وزراعة وصناعة.. مفيش قطاع مش شغالين فيه.. من هقول الإعلام مش بيغطى ده ولا غطوا كويس.. هقول للناس بطلوا ترددوا الكلام اللى بيترمي".

وأضاف الرئيس: "كل المعلومات والبيانات متاحة على موقع مجلس الوزراء والوزارات المختلفة وفق الإنجازات التى تتحقق فيها.. لو دخلت على النقل هتشوف.. وعلى موقع رئاسة الجمهورية.. توقفوا عن أن دولة توفر مليون فرصة عمل زيادة ازاى وبكام.. ده مش بنخوف بعض.. ولما طلبت من الدكتورة هالة السعيد بيخوفنى انا ولما بنجتمع بحضور الدكتور مصطفي.. قولتها ما تخوفوش الناس.. احنا مش بنخاف واحنا معانا ربنا وده أقصى حاجة ممكن نعملها".

قال الرئيس عبد الفتاح السيسي:  "معانا ناس فى مصر حريصة على بلدنا كل إنسان فى مصر مسئول ومش بتكلم عن المسئولين.. انا بتكلم على المصريين".

وأضاف، "إحنا بنحطكم فى الصورة يا مصريين علشان تعرفوا إننا بنحاول نخفف بالإمكانيات الموجودة عندنا.. 3 سنين دلوقتى وسنتين كورونا والسنة خلصت خلاص بتاعة الأزمة الروسية وإحنا لازم نكون متأكدين أن ربنا معانا.. وما تخوفنيش تانى يا دكتورة هالة السعيد.. وشكرا".

السيسي: المخالفات تعطل التطوير والبناء

تحدث الرئيس عبد الفتاح السيسي، عن تأثير المخالفات على تطوير وبناء المحاور الجديدة، متابعا: "كان زمان محور المحمودية اتعمل بسهولة من سنة ونص فاتوا لو مكنشى فيه مخالفات.. بنتكلم عن تعويض الناس وتدبير الأموال المطلوبة لهم.. وبعدين نزيل المخالفات ونعمل المحور.. وفيه حتت مقدرناش نعمل فيها.. وفق الكثافة السكانية قولنا نعمل كوبرى على الطريق لمنع الإزالة ونحافظ على الترعة والناس.. الناس تكون منتبه لده.. المفروض منعملش كده تانى والدولة متسمحش بكده بتاني.. مفيش تعدى على جسر ترعة أو حرم طريق خالص..

وأضاف الرئيس: "حتى موضوع الطريق الزراعى سنة 59.. لو مكنشى على جسر الطريق أو حرم الطريق بناء.. كان ممكن نعمل الطريق 5 حارات و5 حارات فى كل اتجاه بربع التكلفة.. كملنا الطريق الصحراوى للتخفيف على الزراعى.. وطريق النوبارية بالطريقة دي.. علشان نقدر نحرك الناس على الطريق الزراعى والدلتا كويس.. أنا بقول للمسئولين فى المحافظات والمسئولين فى الدولة والمواطنين.. لازم ناخد بالنا.. ده تكاليف كبيرة جدا.. ودى فلوس مصر والناس.. بدل ما اصرف مليار و2 الاقى بصرف 5 و6 مليارات".