الفن
بسمة وهبة تكشف حقيقة مرض حمو بيكا النادر
كشفت الإعلامية بسمة وهبة عن حقيقة إصابة مطرب المهرجان الشعبي حمو بيكا بمرض نادر من خلال حسابها الشخصي على موقع التواصل الاجتماعي المعني بنشر الصور والفيديوهات إنستجرام.
بسمة وهبة تكشف حقيقة مرض حمو بيكا النادر
وقالت بسمة وهبة :" على فكرة يا جماعة موضوع حمو بيكا ده شهادة حق حقيقي".
وأضافت: "وقت خلاف حسن شاكوش وحمو بيكا استضفت شاكوش وسألته هل فعلا حمو بيأخذ حقن غالية رد وقال حمو بيكا مش بيدعي وحقيقي تعبان وربنا يعفي عنه".
مدير أعمال حمو بيكا يكشف عن مرضه النادر
وكشف مدير أعمال مطرب المهرجان الشعبي حمو بيكا في تصريحات صحفية خاصة، عن اخر تطورات حالته الصحية، وذلك بعدما تم نقله إلى المستشفى خلال الساعات القليلة الماضية.
قال مدير أعمال حمو بيكا: «امبارح بعد انتهاء الحلقة بيكا كان مضايق جدا من اللي بيحصله والظلم اللي بيتعرض له، وفي الحلقة عيط وكان متأثر جدا، وخرجنا من القناة وكنت على باب مدينة الإنتاج الإعلامي، فجأة لقيت حمو بيقع مني في العربية».
وأضاف: «أخذت حمو وطلعت بسرعة إلى المستشفى، وكمان أنا على علم بمرض حمو النادر مرض (الكرونز) اللي هو سبب في كرشه الكبير، وكنت خايف عليه جدا ليحصله حاجة، وعند وصولي إلى المستشفى تم حجزه والدكتور شخص حالته بأنه ضغط نفسي وكان ممكن يسبب (جلطة) ولكن هو الحمد لله استقرت صحته».
أضاف: «الدكتور طلب منه الخروج من المستشفى والمكوث بمنزله وهو سيتولى رعايته من المنزل، وهو لازم ياخد حقنه كل 3 أشهر عشان (الكرونز) وهي ميعادها خلال الأسبوع الجاري».
اختتم: «والله أنا وحمو بنجمع 130 ألف جنيه عشان يأخذ الحقنة ولسه لحد دلوقتي المبلغ لم يكتمل، والناس مفكره إنه معاه ملايين ومش شايفين هو فاتح كام بيت وبيصرف على ناس كتير، ربنا أكيد شايف ده وهيرجع يغني تاني في بلده».
المهن الموسيقية ترد على حمو بيكا: النقابة مبتظلمش حد اللي مفروض ينجح هينجح
حرص المايسترو أحمد رمضان سكرتير عام نقابة المهن الموسيقية، برئاسة الفنان هاني شاكر، على الرد عن ما قاله مطرب المهرجان الشعبي حمو بيكا اثناء استضافته في برنامج كلام الناس الذي تقدمه الإعلامية ياسمين عز، عبر احدي القنوات الفضائية قناة MBC مصر.
قال رمضان: «إزاي النقابة هتعند مع حمو بيكا وهو دخل مرتين اللجنة ويسقط».
وتابع»: «النقابة بتعمل لجنة للمطربين وحمو بيكا لم يجتاز ولا لجنة من الاثنين الذي شارك بهم، يعني انت شخص داخل امتحان غناء من المفروض تكون داخل مجهز هتغني ايه، يعنى هتغني ام كلثوم أو غيرها، لازم تكون جاهز، ويدل على ذلك الكلام، الفيديوهات اللي عمال ينزلها على صفحته الخاصة وهو بيتمرن مع عدد من صناع الأغنية»
وأضاف سكرتير عام نقابة المهن الموسيقية: «إزاي النقابة هتعند مع حمو بيكا وهو دخل مرتين اللجنة ويسقط وبيروح بعد المرتين لاستاذ غناء، وكمان عمال يتمرن، النقابة مبتظلمش حد اللي مفروض ينجح هينجح من غير ظلم».
واختتم: «ايضا هيتم تفريغ الحلقة التي أذيعت اليوم ونشوف الكلام اللي قاله حمو بيكا حصل صح ولا لا»
المطرب الشعبي حمو بيكا
ووجه مطرب المهرجان الشعبي حمو بيكا، رسالة لنقابة المهن الموسيقية برئاسة الفنان هاني شاكر، أثناء استضافته في برنامج كلام الناس الذي تقدمه الإعلامية ياسمين عز، عبر احدي القنوات الفضائية قناة MBC مصر.
قال حمو بيكا: أنا عايز أدخل النقابة بجمهوري مش بصوتي، أنا ليا جمهور، وراجل مؤدي ومش لازم أكون كروان.
أضاف: في الدستور حرية الرأي، ملكش تمنعني أنا مش بعمل حاجة غلط، كل حاجة النقابة بتطلبها بعملها، أعمل إيه تاني، إنت بتقولي أخرج بره مصر، لا أنا مصري، ولازم الامتحانات تمشي بما يرضي الله.
وقال حمو بيكا في وقت سابق من خلال حسابه الشخصي على موقع التواصل الاجتماعي فيسبوك: اي حد عاشرني عارف اني طيب وعمري ما جيت على حد، كل واحد وقف في مستقبلي هقوله هشوف فيك يوم وفي أعز ما لديك عشان أنت دمرتلي حياتي.
وأضاف: البلد فيها قانون وهاخد حقي من النقابة بالقانون وإزاي ناس النقابة قالت عليهم مزورة ومسجلة وخدوا الكارنيه بعد أسبوع أنا هكشف كل حاجة وبالقانون اما أكشف ظلم النقابة لي وهاخد حقي مش عاوز أمسك مايك تاني أو أغني.
وتابع مطرب المهرجان الشعبي: حسبي الله ونعم الوكيل في كل واحد ظلمني ومش مسامح اي حد ظلمني، أنا عاوز أكل عيش انا مش بنام من التعب والتفكير بس أنا جبل مش هيهزني ريح وواقف على أرض صلبة وربنا معايا اللي أحسن من أي حد.
