الرئيس السيسى يشيد بجهود المواطنين والقوات المسلحة والشرطة فى الحفاظ على الدولة

أشاد الرئيس عبدالفتاح السيسى، بجهود المواطنين والقوات المسلحة والشرطة، فى الحفاظ على الدولة قائلا: "واتصور واتكلمت فى المسالة دى كثيرا قبل كده، وقلتلكم المشاهد اللى بنشوفها حوالينا بتاكد حاجة واحدة بس أن الجهد اللى بتبذل من كل مواطن مش الجيش والشرطة للحفاظ على الدولة جهد مشكور وبيخلى الـ 104 ملايين وأكتر موجودين على أرض مصر عايشين وعندهم أمل فى بكرة".

أضاف الرئيس السيسى خلال حفل تخرج دفعة جديدة من طلبة الكليات والمعاهد العسكرية: "كل المصاعب بفضل الله سبحانه وتعالى هنعبرها واحنا بخير وفى خير، وأقدر أقول أن احنا واقفين برضه على أرض صلبة معندناش تحديات كبيرة قوى زى بلاد أخرى ليه؟ علشان الأمن والاستقرار اللى موجود فى مصر".

أكد الرئيس عبدالفتاح السيسي، أنه كان علي يقين فى انتصار مصر على حربها ضد الإرهاب، قائلا: "خليني أفكركم من سنين 2013 و 2014 وكان الإرهاب بيضرب في بلدنا، وكنتم بتشوفوا شهدائنا ومصابينا".

اكمل الرئيس السيسي  "كنت بتقولوا الدنيا دي هتفضل كده ولا إيه؟، كنت متأكد بفضل الله هنعبر زى كتير من الأزمات ما تعبر، واللى يقرأ التاريخ هيشوف كده كتير ، وده اللى يهمني أقولكم كده دلوقتي، وبقول لكل المصريين.. الدنيا مش بتفضل على حالها، ودايما ربنا إيده الطيبة موجودة معانا كلنا ومع الدنيا كلها وإلا مكانتش أبدا استمرت".

وأكد الرئيس السيسي، أن مصر ستعبر الأزمة الحالية، قائلا: "المرحلة دى إن شاء الله هنعبرها بخير وسلام، وأتصور إننا متابعين كل المصاعب إللى موجودة مش بلدنا بس، ولكن فى الدنيا كلها، ولكن زى ما قلت قبل كده أزمة كورونا مرت بسلام بآثارها، لكن عبرت بفضل الله سبحانه وتعالى، ونقدر نقول إن آثارها يمكن التعايش معاها".

وأضاف الرئيس السيسى "برضه الأزمة اللى إحنا موجودين فيها دلوقتي حتى لو كان ليها آثار صعبة علينا دلوقتى، لكن أزمة وهتنتهي بفضل الله سبحانه وتعالى، واللى هتبقا الأوطان والبلاد والاستقرار والأمان والسلام، لأن بالمناسبة مفيش بلد هتتقدم فى الدنيا وتعبر مشاكلها إلا بالأمن والاستقرار".