الرئيس السيسي يتحدث عن دور الأكاديمية العسكرية في إعداد وتأهيل الموظفين الجدد داخل الدولة

عبر الرئيس عبد الفتاح السيسي، عن سعادته بالتواجد داخل الأكاديمية العسكرية المصرية اليوم السبت، قائلا: "سعيد بوجودي معاكم النهاردة.. كان لابد أن أنا كل فترة كده أزور الكلية واطمئن عليكم.. والحقيقة طبعا من خلال السيد مدير الأكاديمية خلال الاتصالات الدورية بطمن على الأنشطة والمستوي".

وأضاف الرئيس السيسي، خلال زيارة تفقدية للأكاديمية العسكرية المصرية: "الحقيقة أمر مفرح ومشجع.. وأتصور مهم كمان مش بس أسركم تعرف ده.. ولكن أيضا المصريين يعرفوا أن الأكاديمية بتقوم بدور مهم دلوقتي.. الدور ده بمنتهي البساطة هو مش علي قد القوات المسلحة وطلبة الكليات العسكرية فقط.. النهاردة الأكاديمية بتقوم بدور في إعداد وتأهيل شرائح جديدة من المجتمع تقوم بالعمل داخل الدولة".  

تحدث الرئيس عبد الفتاح السيسي، عن دور الأكاديمية العسكرية في إعداد وتأهيل الموظفين الجدد داخل الدولة، قائلا: "ناس كتير تقول يا تري الهدف من كده إيه.. الهدف تعزيز وتأكيد قدرة أبنائنا اللى هيلتحقوا بأجهزة الدولة المختلفة أن نديهم جرعة مناسبة من الالتزام والفهم والإصرار على العمل خلال التواجد داخل الكلية.. بجانب الشق الفني الخاص بكل جهة والأكاديمية لا تتدخل فيه.. وإعداد الكوادر دي والمهام اللي هتنفذها".

وأضاف الرئيس السيسي حتى الآن النتائج مبشرة جدا جدا والدفعات اللى اتخرجت من الأكاديمية في التخصصات اللى بقول عليها.. في وزارة النقل والمالية والجهات الأخرى زي الرقابة الإدارية والخارجية.. النتائج مبشرة وتؤكد أن التجربة ناجحة.. ودايما وإحنا بنتحرك.. ومش بنقف على حال.. ودايما بنراجع المواقف للتطوير.. ولو فيه ثبات يبقي دي بداية التراجع".