أحمد سعد حديث السوشيال ميديا بسبب تصريحاته المثيرة للجدل

تصدر الفنان أحمد سعد تريند مواقع السوشيال ميديا منذ انتشار تصريحاته المثيرة للجدل بعد استضافته في برنامج «AB talks» الذي يقدمه الإعلامي  أنس بوخش، حيث تحدث خلال الحلقة عن أسرار حياته الشخصية وعائلته، بالإضافة إلى يوم وفاته.

أبرز تصريحات أحمد سعد المثيرة للجدل

وقال أحمد سعد: «بحب يوم وفاتي جدا، واليوم ده اللي هتحرر من كل الحاجات اللي ماسكاني، وعملت أغنية برثي نفسي فيها عشان تنزل بعد وفاتي».

وتابع: «عايز أعيش في سلام من جوه ومن برة، وحلمت حلم غريب وأنا عندي 25 سنة وشوفت حاجات غريبة جدا عن نفسي، وصحيت من الحلم ميت من العياط.

وقال أحمد سعد عن علاقته بعائلته وطفولته: "ابتديت أحفظ قرآن وابتهالات دينية في طفولتي وبعدين دخلت في أم كلثوم وعبد الوهاب، وكنت دايماً في العيلة بحب أظهر عشان كنا 9، وحب الظهور ده نوع من أنواع الأمراض، كنت بحارب طول الأسبوع عشان أبان قدامهم".

وأضاف: "النجاح بالنسبة لي إن كل الناس في الحياة يلاقوا عندك حاجة يحبوها ليك سواء طريقتك أو خفّة دمك، والناس بتسمع أغنية "إيه اليوم الحلو ده" في شوارع باريس والفقراء والأغنياء وبتعمل أجواء حلوة ليهم".

وكشف سعد عن تركه للمنزل وهو في سنّ الـ15 قائلاً: "سبت البيت وأنا عندي 15 سنة... اخترت إني عايز أكون مستقل في حياتي ومكنتش بشرب سجاير ولا بعمل أي حاجة في الحياة، وفضلت طول الوقت عايش عشان أثبتلهم إن وجهة نظري صح... طول حياتي بثبت للناس ومفكرتش أثبت لنفسي، وكل الناس في طفولتها بتخرج، أنا كنت بروح أشتغل في 4 أماكن ورا بعض وأمسك شنطة الملحن وأعمله شاي عشان أغنّي وأقول مواويل".

وعن رأيه في الشهرة، أوضح سعد: "مقدرش أعيش من غير الشهرة... والحاجة الوحيدة اللي آذتني فيها إني مش عارف أكون مع ولادي في الملاهي".

وتابع: "بقالي 3 سنين بنجح نجاح كبير عليا جداً... وكل سنة بيحصل ليا حاجة غريبة، الناس بتقولي السنة دي سنتك فبخاف فبجتهد أكتر".

وعن أقرب الأغاني إليه والتي تعبّر عن شخصيته، قال: "كنت عامل أغنيتين سألت نفسي كتير عن أكتر الأغاني اللي بتعبّر عني وأغنية "أنا إنسان"، وبحس إني ببان على شكل وأنا من جوا شكل تاني خالص، والصراع بين الخير والشر هو ده أنا".

وأضاف: "حاسس إني أنا طيب وغلبان ومبحبش أبان طيب وغلبان... بس أنا كده مع نفسي بيصعب عليا نفسي والناس وفي علاقة روحانية بيني وبين نفسي... وبحب أبين للناس إني الجامد والقوي وأصيع واحد في الكوكب، والبني آدم عايز يورّي حاجة عكس اللي جواه وفطرتي فيها حاجات تتداس".

آخر أعمال الفنان أحمد سعد

وطرح الفنان أحمد سعد ديو أغنية «سبب فرحتي» ظهر فيها برفقة الفنانة أصالة والتي حققت نجاحًا كبيرًا فور طرحها بموقع الفيديوهات العالمي يوتيوب، حيث تخطت حاجز الـ 14 مليون مشاهدة.