الفنان إسلام جمال يتحدث عن فترة زواجه والظروف التي مر بها

تحدث الفنان إسلام جمال في تصريحات خاصة، عن فترة زواجه والأوقات والظروف التي مر بها مع زوجته مودة، قائلاً: "الموضوع حصل في أربع أو خمس شهور، وأنا أخذت القرار أنى أتجوز في ساعتها في شهر تسعة لأنى كنت داخل في شهر 10 مسلسلين، والحمد لله ربنا كرمنى بمراتى".

وتابع جمال قائلاً: "مفيش أى اختلافات فيا عن قبل الجواز، زى ما أنا، وتقريبًا مرتين بس اللى علقت فيها على طريقة معجبة، وكان تعليق لفظى، بس الحمد لله غير كده مفيش، هي واخدانى وأنا ممثل والناس بتحبك في الله، هي عاقلة، والحمد لله فعلاً ربنا كرمنى بيها، هي عارفة أن روحى فيها هي، واختارتها هي".

الفنان إسلام جمال يتحدث عن أصعب مشاهده خلال مسلسل الحشاشين  

أوضح الفنان إسلام جمال طبيعة الشخصية التي قام بأدائها في المسلسل الشهير الحشاشين، والذي عرض ضمن السباق الرمضاني الماضي 2024، حيث قال: " كان المفروض هنبدأ نصور على طول، و حصل تأجيل لمدة سنة، وده ساعدنا كتير، ولأن مفيش حاجة رسمي وموثقة 100%، اتفرجت على حلقات كتير جدا على يوتيوب، قريت كتابين، وبصراحة أخذت اللى أقرب لقلبى مع الرجوع لـ المخرج دكتور بيتر ميمى والمؤلف عبد الرحيم كمال، فكونت شكل للشخصية، وفكره وده كان الاجتهاد".

وتابع جمال قائلا: "كمان اتمرنت خيل بطلب من دكتور بيتر ميمى، وأنا كنت على قدى فيه اللى هو بروح مع صحابى نركب خيل مثلا، كمان اتعلمت استخدام السيوف، وطريقتها الضرب والصد".

إسلام جمال يتحدث عن مخرج مسلسل الحشاشين بيتر ميمي

وتحدث الفنان إسلام جمال أيضاً خلال تصريحات صحفية خاصة، عن مخرج مسلسل الحشاشين بيتر ميمي، قائلا: "الحقيقة إن الشغل مع دكتور بيتر ميمى بيخلى الممثل وهو بيشتغل لو هيتعامل إن ده ماتش بيبقى قلبه على الـGame، لأنه بيبقى شايف إن الراجل ده قلبه على الشغل أوى لأنه دايما عايز يعمل كل حاجة كويسة، ومش بيبطل شغل خالص، كان بيكلمنى يناقشنى فى مشهد هصوره كمان أربع شهور، لأنه قاعد وبيحضر وبيذاكر، ونتناقش ويلفت نظرى لحاجة".

وتابع جمال قائلا: "مش سهل خالص إننا نشتغل مع مخرج مركز أوى، وواخد باله على كل تفاصيل المسلسل، وده اللى خلانى شاركت فى الحشاشين بس فى رمضان 2024، علشان ما كنتش قادر المسلسل كبير، وأنا كمان كنت عايز أحط كل تركيزى على دورى فى العمل، ولو رجع بيا الوقت هعمل كده تانى، مكنش ينفع، هو حالة مش عايز أخرج منها".

وعن أصعب المشاهد التي قدمها، قال إسلام جمال:" الحقيقة أن مفيش ولا مشهد سهل في الحشاشين، بس مشهد قتل عمى، من المشاهد الصعبة جدا، ويارب يكون المشاهدين وصلهم احساسى في المشهد ده خاصة".
وتابع جمال قائلا:" المشهد صعوبته النفسية هتلاقية بيقول لعمه أم تكريما ليك مصيرك هيبقى على ايدى أنا، وفى الوقت ده من الزمن خاصة كان احتراما وتقديرا للعائلة والاهل أن أنا اللى اموته مش حد من الحرس، وفى الاخر هو انسان وهيقتل عمه، حاحات من جوه صعبة، مش سهلة خالص، نفسيا مرهق جدا، وجسديا".

وأشار جمال قائلا:" الأصعب كان فترة التحضيرلأننا قعدنا كذا مرة وكان دايما دكتور بيتر ميمى عايزنا نتمرن، مش انا بس انا وزمايلى، ويفضل يشجع فينا، بس فترة التصوير احنا خلاص خلصنا مذاكرة، ودلوقتى بنحل اللى ذاكرناه، بس مكنتش اهدى برضه".

وأكمل جمال قائلا:" من الحاجات الصعبة برضه أننا بدانا تصوير في الصيف، واللبس زى ما الناس شافت كان عامل ازاى، وبنصور في استديو كل مصادر النور شمع، مشاعل حوالينا،  ومع النور اللى بنستخدمة في الإضاءة، كنت بضطر اخرج اخد نفسى وارجع أقول جملتين، ظروف مش عادية، مش بنصور في مكتب والدنيا طبيعية، العمل صعب في كل حاجة، خلصنا من البلاتوه للصحرا بقى".

مسلسل الحشاشين 

ومسلسل الحشاشين من بطولة كريم عبد العزيز، فتحى عبد الوهاب، نيقولا معوض، ميرنا نور الدين، أحمد عيد، إسلام جمال، محمد رضوان، سامى الشيخ، عمر الشناوى، نور إيهاب، سوزان نجم الدين، ياسر علي ماهر، بسنت أبو باشا وعدد كبير من الفنانين، وضيوف الشرف، وهو من تأليف عبد الرحيم كمال، وإخراج بيتر ميمى، وإنتاج شركة سينرجى.