الفن
غادة عبد الرازق: سعيدة بنجاح "صيد العقارب" والوقوف أمام الخولي وأحمد ماهر
قالت النجمة غادة عبد الرازق خلال تصريحات صحفية، عن مسلسلها الأخير بعنوان صيد العقارب، الذي عرض ضمن السباق الرمضاني الماضي 2024، إنها سعيدة بالنجاح الذي حققه، مشيرة إلى أن تعاونها مع النجمين الكبيرين رياض الخولى وأحمد ماهر ساهم في نجاح المسلسل بشكل كبير.
مسلسل صيد العقارب
ومسلسل صيد العقارب بطولة غادة عبد الرازق، رياض الخولي وسيمون ومحمد علاء وأحمد ماهر، مجدى بدر، سامية عاطف، ميار الغيطى، عماد صفوت، أحمد ماجد، أحمد جمال سعيد، محمد على رزق، عزوز عادل، منال سلامة، صفاء جلال، مى القاضي، سيف الديربى، محمد صلاح، ريم المصرى، تأليف باهر دويدار، إخراج أحمد حسن، إنتاج شركة فينومينا.
أبرز تصريحات غادة عبد الرازق مع لميس الحديدي
قالت غادة عبد الرازق: "ما عنديش استقرار نفسي أنا ست بتعامل مريضة منذ 35 سنة، فمعهنديش استقرار نفسى ولا عاطفي".
وتابعت قائلة: "التمثيل بيؤدي للشهرة، ويؤدي لحاجات كتيرة جداً من أول ما بتميل رغبتنا النجاح والشهرة والماديات كل دول بنوصلهم عن طريق واحد، وقصاد ده أخد مني حاجات كتيرة جدا، وبشوف ناس تانيين بحسدهم على الاستقرار والزوج والأطفال وكل حاجة".
وقالت غادة عبد الرازق: "ساعات بحس إن ده كان سبب إني دمرت ناس تانية لأن في يوم من الأيام بنتي دي كان عندها استقرار في بيتها، ثم انفصلت لأنها كانت متزوجة فى يوم وفي بيتها، وممكن ومحتمل أكون أنا السبب وقصرت في هذا الجانب".
وعن تحميلها لنفسها لتلك المسئولية أجابت: "كل راع مسئول عن رعيته، وروتانا تحت بند أنا الراعي بتاعها لأنها منذ طفولتها هي مش مستقلة ومرتبطة بيا، حتى لم يكن لديها بيت مع والدها وأنا بحترمه وبقدره لأنه هو السند الحقيقي لينا، لكن أنا ممكن أكون السبب إنى بوظتلها حياتها".
وردا على سؤال لميس الحديدي لماذا تلومين نفسك، ردت قائلة: "ممكن تكون دي الحقيقة، الحلال والحرام بيّن، مش لازم ندخل الأمور في بعضها، أصعب حاجة إننا نضلل أنفسنا وبنقول كلام مش حقيقي بتلوم نفسك ليه؟ لأن أكيد الإنسان عمل حاجة غلط".
وأضافت غادة عبد الرازق قائلة: "طول الوقت كنت بحاول أثبت لأهلي إني قوية، كان عندى أخ صغير توفى اسمه خليل وهو ولد واحد وكان مميزا جدا عننا علشان هو الولد وكان سبب في موت أبويا".
وتابعت قائلة: "أبويا كان بيترافع في قضية الوفد بمجلس الدولة، وقبلها بيومين أخويا خليل عمل حادثة وخبط حد بالعربية والولد اللي اتخبط كان فى المستشفى، وخليل مكنش عايز يقول لأبويا الولد فين، فاللي أنا افتكرته كانت فيه خناقة وبابا كان داخل على خليل أوضته يضربه وبيقول له قوللي الولد فين، وبعدين الحمد لله طلع إن الولد مكنش مات، بس بابا خلال جلسة الوفد جاله هبوط في الدورة الدموية ووقع بالمحكمة وجاله جلطة ومات، وأنا وقتها كان عندى 12 سنة ومن وقتها كنت باثبت إنى أقدر أقيم هذه الأسرة".
وأكملت غادة عبد الرازق: "خليل أخويا اتوفى وأنا عندى 15 سنة، وبابا توفى وأنا عندي 12 سنة، وبالتالى فضلت أنا وماما ويسرية، وبدأت اشتغل وعمرى 21 سنة من بوابة الإعلانات، ومكنش التمثيل في الخطة".
وواصلت: "أهلي في الأول رفضوا دخولي التمثيل، وماما وقعت وتعبت بس أنا كنت عندية، وفي بداية مشواري قالولي هتفضحينا وهتبقى كومبارس، قلت لهم في يوم من الأيام هبقى نجمة كبيرة وهوريكم".
