الفن
عمرو يوسف يكشف تفاصيل إصابة زوجته بالسرطان ورحلة علاجها الطويلة
نشر النجم عمرو يوسف صورة تجمعه بزوجته الفنانة كندة علوش على حسابه الشخصي بموقع"إنستجرام"، وكشف عن تفاصيل إصابتها بمرض السرطان ورحلة علاجها الطويلة، قائلاً: "الحمد لله ثم الحمد لله ثم الحمد لله على كل شيء، ظروف صعبة مرينا بيها على مدار سنتين، لكن أنتِ كنتِ مؤمنة ومسلمة أمرك لله".
وتابع عمرو يوسف: "ظهورك وكلامك قوّى ناس كتير هتبدأ رحلتها وكانت خايفة لكن انتي في عز تعبك أديتيهم قوة، ربنا يخليكي ليا ولأولادك ولحبايبك في الدنيا كلها اللى ما بطلوش دعاء ليكي من ساعة ما عرفوا".
واختتم عمرو يوسف حديثه: "ربنا يحبب فيكى خلقه كمان وكمان، عشان انتى تستاهلي كل حب الدنيا يا أجمل قلب في الدنيا".
كندة علوش تكشف عن إصابتها بسرطان الثدي
كشفت الفنانة كندة علوش خلال لقاءها مع منى الشاذلي، عبر قناة الإعلامية بموقع الفيديوهات «يوتيوب»، عن خبر إصابتها بمرض السرطان منذ عدة أشهر.
وقالت كندة خلال حوارها: «أنا رضعت كريم لمدة 9 شهور، رغم أني كان نفسي أكمل، وحسيت إن فيه مشكلة، وقررت أوقف، وعملت تشيك أب، وقالولي التهاب وبعد فترة حسيت إن عندي أعراض مش بتروح».
وتابعت كندة: «وبعد فترة عمرو قالي روحي اعملي تيست اتأكدي، وروحت للدكتورة قالتلي أنا عايزة آخد عينة، وهي وشها بقا لونه أصفر ووشها خايف، وخدت عينة لمعمل التحاليل».
وأضافت كندة علوش: «الطبيب أخبرني بوجود أكثر من ورم خبيث، لكني تمالكت نفسي ولم انهار، وعمرو كان خايف أكتر منيّ وقلقان، وطلع عندي كتلة متشعبة من السرطان»، موضحة أن جدها وخالها توفيا بأمراض خبيثة، كاشفةً أنها خضعت للعلاج سريعًا وساندها زوجها.
وأردفت كندة علوش: «أنا عمري ما قولت ليه يارب.. وحسيت ان ربنا بيوصلي رسالة إني أهتم بنفسي وبصحتي وبوالدتي».
محمد صلاح يدعم كندة علوش خلال مرضها
وكشفت كندة علوش عن دعم محمد صلاح لها بعد معرفته بمرضها، وقالت: عمرو كان قاعد وجاء مكالمة له فلقيته بيقول "اه ازيك اه طبعاً ايه ده "ولقيته متحمس وحبيبي بعدين بيقوله هي كويسة ، وأنا مع العيال مش مركزة بقوله مين يا حبيبي، بيقولي محمد صلاح .. قولتله مين محمد صلاح قولتله محمد صلاح مو صلاح وهو عارف عمرو بس مش أصدقاء مفيش تواصل، قالي عرف من أصدقاء مشتركين انك تعبانه و جاب نمرتي واتصل وقال له أنا سمعت إنه كندة تعبانه وعايز أقولك في أي لحظة أنا بيتي موجود لو عايزين تيجوا تعملوا متابعة هنا او تبعتولي الورق وأنا اخده عند دكاترة هنا".
وتابعت كندة علوش: " والله العظيم بقول عمرو أنا مش مصدقة إيه الحلاوة دي بعدها بفترة لقيت عمرو بيتكلم بنفس الحماسة وبيقولى في حد عايز يكلمك تعالي بس، وأنا بمسك التليفون قالي محمد صلاح، ردت عليه وقالى طمنينى، قولتله "أنا كويسة جدا أنا خلاص بخلص الكيماوى، وقالى عايزك تعرفي إن ليكي عيلة وليكي بيت واسمحيلي يا كندة إني أتطمن عليكي تانى".
واختتمت كندة علوش كلامها: " قد ايه هو إنسان حقيقي وبسيط إنه هو دور على النمرة واتصل أول مرة وتاني مرة بأشخاص هو يعرفهم من بعيد ويقولي انتي عارفة انتي غالية علينا قد إيه قولتله أنت اللي غالى".
