رسالة رثاء حزينة من صلاح عبد الله لـ محمد أبو الوفا
قال الفنان صلاح عبد الله عبر صفحته على موقع التدوينات القصيرة تويتر: "عارف يا محمد أنا النهارده صحيت من النوم الساعة ٣م وأول حاجة قلتها الحمد لله أخيراً نمت كويس والورم في رجلي فش كتير وحاسس إني إتحسنت صحياً بفضله وكرمه ومقبل على الحياة بإبتسامة جوانية عريضة ولذيذة وعاقد العزم على مواصلة دعم منتخب بلدي في مواقع التواصل وفعلاً بعد الإجراءات العلاجية المعتادة يومياً فتحت الفيسبوك وأول حاجة شفتها صورتك يامحمد".
متابعاً: "فاكر يامحمد المرة الوحيدة اللي قعدت فيها معاك قعدة طويلة أثناء التحضير لمشهد يجمعنا في عائلة الحاج نعمان وكل ماتقولي ياأستاذ أقولك ماتقوليش ياأستاذ لإن إنت الأستاذ ووقفت في الاستوديو وقلت بعلو الصوت ياجماعة أنا ليا الشرف والفخر إني همثل دلوقتي قصاد الأستاذ محمد أبوالوفا".
مضيفاً: "عارف يا محمد أول مرة شفتك في التليفزيون قعدت أقول لنفسي مين الراجل دا وكان فين الراجل دا وإزاي بيمثل بالحلاوة والبساطة وبالشكل دا الراجل دا وكل مرة كنت بقول نفس الكلام وأنا قاعد قصادك زي التلميذ يا أستاذ فاكر يا محمد لما قلتلك إنت كنت فين ياجدع إنت وإزاي وليه دانت المفروض تكون في حتة أكبر بكتير من اللي إنت فيها إسماً وأجراً وشهرة في حتة أكبر كتير من اللي إحنا فيها أو بالتحديد من اللي أنا وصلت ليها وترد بضحكة عسل مالهاش زي بترن دلوقتي جوايا وإنت بتقولي بطل تواضع ياأستاذ وأقولك ناني ماتقوليش ياأستاذ ودا مش تواضع والله دا إقرار بالحقيقة والله إقرار وإعتراف بالحقيقة يا محمد يابوالوفا، عارف يا محمد والله العظيم أنا مش عارف ليه كتبت كل الكلام دا في نعيك إنت بالذات ومش عارف ليه لغاية دلوقتي مش قادر أبطل عياط مع إني ماعرفش عنك غير إنك ممثل عظيم ظهر متأخرا ورحل مبكراً وشفت في عينيه لما قعدت وياه إن الدنيا دي مش فارقة معاه ولإني بدأت أتعب يابوالوفا هختم برسالة ليك ياأستاذ".
واستطرد: "فاكر يا محمد لما قلتلك إنت المفروض تكون في حتة أحسن كتير أهو إنت دلوقتي ياحبيبي في الحتة الأحسن والأفضل والأجمل والأنضف والأبقى والأحلى والأعلى بإذن الله ورعايته ورحمته وفضله وكرمه، أسأكم الفاتحة والدعاء للأستاذ محمد أبو الوفا". كتب أحمد حمادة
