الفن
عقب ظهور نتيجة الثانوية العامة.. هنيدي يعلق
شارك الفنان محمد هنيدي عبر حسابه الشخصي على موقع التواصل الاجتماعي "فيس بوك" منشور داعما فيه الطلاب اللذين لم يحصلوا على درجات عالية قائلا: "نتكلم جد .. ماتخليش حد يحطلك مقياس للنجاح في حياتك .. النجاح ممكن يكون بمجموع كبير في كلية وممكن تعمله من غير المجموع ده برده".
وأضاف "هنيدي": "النجاح مش بالفلوس.. ولا بصور انستجرام اللي ظاهر فيها إنك سعيد وبتصيف كل اسبوع في مكان شكل.. ولا انك عندك فولورز او قناة يوتيوب كبيرة.. النجاح ملهوش مقياس لكل الناس.. انت ممكن تكون شغال شغلة بسيطة بس سعيد وراضي وناجح فيها.. فكرة ان ناس حصرت النجاح في اشكال معينة وانك تقتنع بإن ده هو النجاح.. ده اللي هيخيلك عمرك ما هتبقى سعيد".
وأكد الفنان محمد هنيدي ان "النجاح هو انك تحقق اللي انت عايزه حسب قدراتك وعقلك ودماغك .. مش انك تحقق اللي الناس عايزاه وشايفاه نجاح.. النجاح انك توصل لسعادة ورضا سواء انت بقى ملياردير او اللي جاي على قد اللي رايح.. اوعى تحصر فكرة النجاح والسعادة في الفلوس أو في الشهرة ولايكات فيسبوك وانستجرام ومشاهدات يوتيوب.. لإنك كدة عمرك ما هتبقى سعيد".
نجاح فيلم الانس والنمس
ومن ثم قام الفنان الكوميدي بإحدي التعليقات مروجا لفيلمه الجديد ومداعبا لجمهوره الكبير قائلا: "وبما إننا بنتكلم عن النجاح .. فمتنسوش تشوفوا فيلم النجم الكبير الناجح محمد هنيدي .. فيلم الإنس والنمس اللي محقق نجاحات كبيرة في السينمات وفلوس"
وقد حاز المنشور على تفاعلات ومشاركات كبيرة من المتابعين، حيث علق أحدهم قائلا: "أنا من ساعة ما عرفت انك جايب 51% في الثانوية العامة وانا متفائل رغم الفشل الي غرقان فيه".
وقال مجدي جلال مادحا الفنان الكبير " مش قلتلك انك جميل اخلاقياً وثقافياً ياهنيدي هو سبب حبنا ليك ده من فراغ، لاء ده جاي من شخص متواضع ومجتهد زيك تعب كتير في حياته ونجح وربنا كافأك بالخير، أعمالك دايماً تدرس عشنها بكُل تفاصيلها من شغف لطموح لكوميديا لسفر لحزن، بحسد جيلنا والله ان اتربي على أعمال هنيدي.. بجانب انك مُخلص لحُب زمايلك لو علاء الله يرحمه عايش كان يشهدلك بده وعمرك ما نسيتهم.. حقيقي كُل ما اشوف الجيل الحالي من العك الفني والغنائي اللي بيتقدمله من بيكا ورمضان وشاكوش بشفق عليهم وبعذرهم.. حاولت احطك في مقارنة مع حد فيهم قلبي لم يطوعني".
وأضاف آخر "كل الحب ليك، قمة العقلانية والفهم والتواااضع ربنا يريح باالك ويمتعك بالعاافيه يااارب".
