بيكا يرد على الساخرين من عدم استكمال تعليمه
شارك مغني المهرجانات الشعبي حمو بيكا على حسابه الخاص على موقع التواصل الاجتماعي "فيس بوك" منشور يرد فيه علي الساخرين من عدم استكمال تعليمه قائلا: "بتقولو عني جاهل ومش متعلم .. مع إن دي حاجة
أنا عمري ما أنكرتها ولا حتي خبيتها علي الناس
من يوم ما ربنا كرمني واتشهرت وبقي ليا جمهور
بس هرجع وأقولكم تاني إنها حاجة مكنتش بايدي
متابعا: "أنت بقي يا "متعلم "
التعليم علمك إنك تقعد تعاير الناس بعيوبها؟
التعليم علمك إن تفضل تتنمر علي خلق الله ؟
التعليم علمك إنك مباح ليك الشتيمة في حد هو أقل منك في شئ؟
أكيد لا فمتجيش من ورا شاشه وكيبورد تعمل فيها عم الناصح
وانت أصلا ً موركش حاجة تعملها !
وأضاف المغني الشعبي أنا متعلمتش ومنولتش الشرف الكبير ده، بس اتعلمت حاجات كتير في الدنيا انت متعلمتهاش لسه، اتعلمت احترم الكبير والصغير .. اتعلمت اشقي واتعب من صغري اتعلمت اني مغلطش في حد .. اتعلمت حاجات كتير جداً في حياتي انت عمرك مهتتعلمها طول ما انت باصص للناس ..!
فكر في كلامك كويس وكومنتاتك كويس قبل ما تكتبها
وقبل ما تقول انك متعلم افتكر انك في "تربيه وتعليم" يعني التربيه قبل التعليم.
رد المتابعين
وقد لقي هذا المنشور تفاعل عدد كبير من المتابعين، حيث علقت رحمة العربي قائلة: "انت أنضف واصفى شخصيه فنيه انا شوفتها لغيت الوقت وحقيقي بحبك جدآ مش عشان انت مغني انا اصلا مليش ف الاغاني ولا بسمعها أو حتى عشان مشهور حباك لشخصك مع أن مينفعش احكم ع حد من غير ما اعشرو بس انت وشك كتاب عنوانه الطيبه وربنا بيكرمك وبيرزقك عشان قلبك الطيب وعشان الخير اللي بتعملوا وتقريبآ كده ومش تقريبآ كمان ده اكيد انت لو كنت شخص مش مشهور كنت هتتحب من كل خلق الله سيبك من اللي يتنمر أو يتنطط ع خلق الله بحته شهاده هو اصلا معلقها ع الحيط اتعلم بس الحروف والارقام لكن متعلمش الاخلاق والخوف من ربنا سيبك منهم ده حقد و غيره مش اكتر كله عند ربنا.
وأضاف آخر "يكفي أن نتعلم الأخلاق والمعاملة قبل القراءة والكتابة.. فعلاً التربيه قبل التعليم .. هل نسوا قدوتنا في الحياه الأمي الي علم المتعلمين .. منور يا فنان".
