رياضة
اللجنة الأولمبية تكشف سبب إخفاقات بعثة مصر في الأولمبياد
علق رئيس اتحاد السباحة وعضو اللجنة الأولمبية المصرية ياسر إدريس، على الخروج المتتالي للاعبي البعثة المصرية المشاركة في أولمبياد طوكيو2020.
وقال إدريس، إنّ الأمور تسير على ما يرام في أولمبياد طوكيو 2020، متابعًا: "اللي هزّ البعثة شوية الاستعجال في الحصول على الميداليات، إحنا لسّه في البداية".
وأضاف إدريس، خلال لقاء عبر تطبيق «زووم» لبرنامج «صباحك مصري» المذاع عبر شاشة «MBC مصر 2»، أنّ النتائج التي حققها الأبطال في الأولمبياد منحت المواطنين طموحات كبيرة وجعلتهم منتظرين الأولمبياد، وزاد: «اصبروا شوية عشان الولاد متتهزش، في ألعاب نتائجها بتتأثر بأجزاء من الثانية، وعندنا لاعبين أعمارهم السنية صغيرة وميتحملوش الضغط العصبي اللي بيتعرضوا له».
وتابع رئيس اتحاد السباحة وعضو اللجنة الأوليمبية المصرية: «معانا لاعيبة لسة متطعمتش لأن سنها أصغر من 18 سنة، في ألعاب كتير زي الجمباز والسلاح والسباحة، وأرجو يبقى في صبر، مينفعش نعرض أبطالنا اللي بذلوا مجهود للضغط، وبنبص على اللي بيكسبوهم بس، ولو شفنا جدول النتائج هنلاقي دول كتير أقل مننا في النتائج».
وتحدّث إدريس عن السباحة فريدة عثمان، قائلا إنّها بطلة العالم في سباق الـ50 متر فراشة، وهو ما لا يوجد في الأولمبياد: "الـ50 متر حرة مش سباقاتها، واللي بيفهم الكلام ده كويس هم المتخصصين في السباحة، وزمان كانوا بيقولوا إن السباحين تماسيح النيل وقادرين على التحمل، زمان كانت سباقات الميّة المفتوحة 90 كم و100 كم، لكن النهارده مفيش الكلام ده، في سباقات المسافات الطويلة 10 كم وبقينا سباحين سرعة مش سباحين تحمل، الوضع اتعكس".
ولم توفق البعثة المصرية المشاركة في دورة الألعاب الصيفية "طوكيو 2020" في الفوز بأي ميدالية أولمبية منذ انطلاق المنافسات، وحتى الآن.
اقرأ أيضا..
